جواز السفر ضاع وأنت مسافر... هتعمل إيه؟
جواز السفر ضاع وأنت مسافر... هتعمل إيه؟

اتكلمت قبل كدة عن تعليمات الأمان العشرة للحفاظ على فلوسك وأنت مسافر، دلوقتي بقى خلينا نتكلم عن احتياطات الأمان لجواز السفر. طبعا مش محتاج أولا أأكد عليك أن جواز السفر ده أكتر حاجة تحافظ عليها بعد فلوسك وأنت مسافر. لأنه لو ضاع، فعلا هتكون حاجة مقرفة جدا. المصيبة الأكبر كمان لو كان في سفريات كتيرة قبل كدة وتأشيرات.

صورة وSCAN لجواز السفر وجميع صفحاته!

أول حاجة تعملها بعد ما تقرأ المقالة دي، هي أنك تاخد جوازات السفر بتاعتك القديمة والحديثة كلها، وتصور كل الصفحات اللي فيها وتعملها سكان وتشيلها على Cloud Storage بتاعتك. أنا عندي ملفات PDF فيها أكثر من مائة تأشيرة ومئات الأختام، كلهم شايلهم على Google Drive بتاعي علشان لو جوازات السفر ضاعت لأي سبب، يكون عندي نسخة من تاريخي. أقدر أطبعها من أي مكان في حالة التقديم على أي تأشيرة في أي مكان.

ما هي استخدامات جواز السفر وأنت مسافر؟

أول يوم السفر وأنت مسافر طبعا، من أول ما تدخل المطار لحد ما توصل مطار الوصول النهائي، أول ما توصل مكان إقامتك في الفندق أو الهوستل، لو هتركب أتوبيس بين مدينة وأخرى (في أوروبا) بيحتاجوا يشوفوا إثبات شخصية علشان يتأكد من اسمك والتذكرة أو طبعا لو هتعبر حدود بلدين محتاجين تأشيرتين مختلفتين. أخر يوم في الرحلة في مطار الرجوع لحد ما توصل مطار بلدك.

خلال بقى رحلتك، هل في أي داعي إني أمشي بجواز السفر في الشارع؟

في أغلب الأحيان، لا يوجد أي داعي لحمل جواز السفر معاك في أي حتة وأنت مسافر في أي بلد. أول ما توصل محل إقامتك، تخبي جواز السفر في مكان ثابت في شنطتك، وتطلعه في حالتين فقط أثناء السفر: تغيير محل إقامتك من فندق إلى آخر أو ركوب مواصلات بين أي مدينتين/دولتين إذا طلب منك.

سيبه في محل إقامتك... محدش عايز يسرقه والله! لا تقلق، هو ليس بمطمع لأي حرامي أو أي كائن على وجه الأرض.

يبقى جواز سفرك يفضل في محل إقامتك، خبيه في الشنطة واقفل عليه بمفتاح لو قلقان أوي يعني...

يعني أمشي من غير أي إثبات شخصية كده؟

أنصحك تمشي فقط بصورة من أول صفحة في جواز السفر وتأشيرة البلد اللي أنت فيها – صورة ملونة وش ظهر، وغلفها بلاستيك قبل ما تسافر، وخليها في جيبك. هي دي اللي تخرج بيها كل يوم. لا تخرج يوميا بجواز السفر… ملوش لازمة خالص.

احنا علشان متعقدين من الحملات الامنية والكماين في وطنا العزيز، متخيلين أن باقي دول العالم بتعمل كده. مفيش أي حد وأنت ماشي في الشارع هيقولك هات بطاقتك ولا وريني جواز سفرك أو تأشيرتك. الا حالات نادرة جدا أو طبعا لو عملت مخالفة ما في مكان ما وطلب منك البوليس إظهار جواز سفرك. أنا بقالي ١٠ سنين بسافر، لم يطلب مني جواز السفر بدون أي داعي في أي مكان، إلا مرة واحدة القى القبض عليا البوليس الأفغاني وأنا في هرات في افغانستان علشان كنت بصور في مكان بدون تصريح، وبعتوا معايا عسكري الفندق جبت جواز السفر وروحنا كملنا التحقيق في المديرية.

أيه الحالات الأخرى اللي بيكون مطلوب منك جواز السفر أو إثبات شخصية، هل لازم الأصل ولا الصورة تكفي؟

أوروبا وأسيا

- بعض أماكن السهرات في أوروبا، ممنوعة لمن أقل من ١٨ أو ٢١ سنة، ممكن موظف الأمن بتاع أي مكان يطلب منك تحقيق شخصية لو شاكك إن سنك تحت السن القانوني. ممكن يكتفي إنه يشوف صورة من تحقيق الشخصية. صورة جواز السفر كفاية.

- عند القيام بعمل تسوق بمبالغ كبيرة بالكريديت كارد، قد يطلب منك الكاشير إثبات شخصية بالإنجليزي عليه اسم زي اللي على البطاقة البنكية المستخدمة، علشان يتأكد إنها مش مسروقة. حصلت معايا في بعض الأماكن في أوروبا، أيام ما كنت غني بقى وبعمل شوبينج كتير كل سفرية. أحيانا بيقبلوا أي صورة  تحقيق شخصية مكتوب بالإنجليزي. مرة في ZARA مدريد قبلوا مني كارنية الغطس كإثبات شخصية. يعني صورة جواز السفر كافية جدا.

أمريكا

- لو شعرك أبيض وسنانك واقعة ووشك مليان تجاعيد وعمرك فوق الـ ٧٠ سنة، وداخل أي بار أو كلوب في أمريكا، هيطلبوا منك في أغلب الأوقات يشوفوا تحقيق شخصية أصلي يقول إنك فوق السن القانوني. أنا ضاعت عليا حفلة جبارة في ميامي علشان روحت من غير جواز السفر. لم يقبلوا الرخصة علشان كانت لا توضح السن.

- لو هتشتري خمور من أي محل في أمريكا، بيطلبوا يشوفوا تحقيق شخصية أصلي يثبت إنك فوق ٢١ سنة برضوا. للأسف حصلت معايا وأنا في تكساس وكان مستضيفي ٢٠ سنة وطلب مني أساعده في "الجريمة" دي.

- أحيانا في أمريكا برضو بيطلبوا تحقيق شخصية أثناء التسوق بالكريديت كارد، أو بيطلبوا كارت تاني مكتوب عليه نفس الأسم. يعني لو معاك كارت VISA وكارت آخر MASTER، والاتنين باسمك، ممكن ده يكون إثبات كافي أن الكروت دي بتاعتك، وبيتنازلوا عن رؤية تحقيق شخصية.

- لو عملت أي مخالفة طبعا في أي مكان ما، اتمسكت من غير تذكرة مترو مثلا في أوروبا، بيكون مطلوب منك جواز السفر والتأشيرة طبعا. خليهم يبعتوا معاك أمين شرطة علشان تجيبهم من الفندق وقتها بقى.

كل ده بنعمله علشان محدش ضامن عدم ضياع جواز السفر أثناء الرحلة. محدش ضامن طبعا إنه ما يتسرقش لا قدر الله. شنطة تضيع مثلا. حاجات كتير في علم الغيب، وياما رحلات باظت بسبب ضياع الباسبور. أأمن مكان إذا هو خزنة غرفة الفندق أو الهوستل، أو في أمانات الفندق أو الهوستل.

طيب لا قدر الله، لو تعرضت لحادثة سرقة وضاع جواز السفر بتاعك، أيه العمل؟

تعمل محضر في أقرب قسم شرطة في المدينة اللي ضاع فيها الباسبور.

تتوجه على أقرب قنصلية/سفارة لاستخراج وثيقة سفر، يكون معاك صورة شخصية، صورة المحضر، صورة جواز السفر. ممكن تاخد عدة ساعات أو يومين ثلاثة، على حسب وضوح موقفك من التجنيد.

تقدر تسافر بوثيقة السفر من أي مطار في العالم علشان ترجع بلدك، لأنها بديل عن جواز السفر.

اللي حصل معاه الموقف ده يا جماعة يا ريت يشاركنا تجربته علشان نتعلم منها كلنا.

مميزات وعيوب الإقامة في هوستيل أثناء السفر خارج البلاد مميزات وعيوب الإقامة في هوستيل أثناء السفر خارج البلاد

الفنادق ليس الاختيار الوحيد أمامك للإقامة أثناء السفر، هل جربت من قبل...

المصدر : فستاني